ايه حكاية الكلام اللى بيمشى تحت كل قناة بتفرج عليها

ايه حكاية الكلام اللى بيمشى تحت كل قناة بتفرج عليها





بعد التدقيق الشديد ف شرايط القنوات الفضائية ( شرايط الشات اللى بتبقى متلقحة ف آخر الشاشة !!!! ) و بعد التتنيح بالساعات قدام شاشة التلفزيون .. استطعت بقدرتى العبقرية و الفذة من نوعها أن أستنتج ........... ان نص الشعب حتما ًغبى و عايز الحرق !!!!!




لأ اللى بيحصل ده مش طبيعى !!! أنا قريت شوية جُمل يا جماعة بجد تنحت قدامها !! و بين كل جملة و جملة كان هيجيلى شلل





إليكم الشلل التالى

*** فراولاية : بحبك اوى يا سعيد يامانجة
مانجة ايه سكت قلت يمكن عشان الصيف

*** ربنا يرجعك بالسلامة يا ابو محمود
ماتنساش تجيب معاك بطيخ
قال يعنى خلاص البطيخ هيوفقه زراعته لو مالحقتش تكتب كدا حاجة تجنن


*** ممكن حب اسكندرانى***
آيوووووووووووه و ماله !! طبعا زى ما انتوا عارفين فيه حب اسكندرانى و حب قاهرى و فيه فلاحى و فيه صعيدى !!! و اذا مشينا ع الحدود شوية هنلاقى فيه حب لبنانى و حب امريكانى و صينى و يابانى !!!! و هكذا و ماقولكوش بقى ع الحب المريخى !!!!
و برضه فيه حب بالفراخ و حب بالكباب و فيه بالشطة و اللمون !!!!!!! و يا سلام بقى ع الحب بالجبنة !!!
فظييييييييع !!! خصوصا لما بيتقطع عليه طماطم بيبقى مسخرة





*** أنا 75 سنة ممكن أتعرف على ليدى مناسبة***
خمسة وسبعين سنة يخرب بيته و قادر يمسك الموبايل و يبعت مسج ؟؟!!! ما شاء الله لسه ف عز شبابه برضه !! آه و ماله ممكن تتعرف على كركوبة مناسبة


*** ممكن واحدة جميلة للصداقة و الحب و ياريت برضه للسفر ***
آه ممكن طبعا !!!
و يا ترى حضرتك عايزها كام سلندر؟؟؟؟؟؟؟؟؟؟


*** أنا شاب متدين ممكن ليدى عندها شقة ***
آه و ماله !! و فيه برضه شقة و عليها ليدى مجانا !!!! و ياترى ايه مواصفات الشقة اللى عايزها ؟؟؟؟؟؟؟؟؟؟؟؟؟؟


*** أنا دلوعة و شبه نانسى عجرم ممكن أتعرف ***
آه و نص !! و ياترى واخدة من نانسى عجرم قفاها و لا كعب رجليها ؟؟؟؟؟؟؟؟
اتدلعى يا اوختى و ماله !! و لما حضرتك أمورة كده امال بتعرضى نفسك ليه ع الشاشة ؟؟؟؟؟ ايه محدش راضى يشترى خلقة نانسى عجرم ؟؟؟ ايه الرجالة بقت بتطس ف نظرها ؟؟؟؟؟؟؟؟؟؟؟؟؟ لأ معندهمش حق


*** أنا ف اعدادى ممكن أتعرف على بنت حلوة ***

هيا جات عليك ؟؟!! و ياترى عايزها ف سنة كام يا حبيبى ؟؟؟؟؟ ابتدائى و لا حضانة ؟؟؟؟؟؟؟ أنا بالشكل ده هيجيلى السكر



***فلانة : أنا نكدية موت ممكن أتعرف على نكدى و ننكد على بعض ***
*** فلان : أنا نكدى مووووت !! و قعتك سودة و نهارك مش باينله لون ***
كان نفسى أمسكهم هما الجوز و انكد على أهاليهم






*** معاكى فلان ممكن أعرف اسمك سنك طلباتك ***
آه و ماله أنا فلانة يا ابنى ... و النبى اطلبلى واحد كباب و اتنين بانيه !!!!
احم احم .. و ياريت لو معاهم جوز حمام



*** أنا عايز بنت للارتباط سمرا أو بيضا أو قمحى ما تفرقش ***
حمرا !!!!!!!!!!!! تاخدها حمرا ؟؟؟؟؟؟؟؟؟؟؟ طب ايه رأيك ف البنفسجى ؟؟؟؟ جديد و منزلش السوق



*** ممكن واحدة جميلة استايل عشان أحبها ***
آه و ماله !! أنا برضه عايز بطارية للموبايل بتاعى عشان أنا قربت أهنج !!!!!!


*** أنا سى السيد بدور على أمينة تسمع الكلام و تقول حاضر ***
آه و ماله حاضر يا اخويا !!! بقى حضرتك عايز أمينة ؟؟؟؟
طب غوووووووووووووو ور الله يحرقك





*** لو انت بتحبنى بجد ممكن أديلك رقمى !! ***يا ما شاء الله !!! انتوا بتحبوا بعض الأول و بعدين تتعرفوا على بعض ؟؟؟؟؟؟؟؟؟؟؟؟
تصدقوا بالله أنا دلوقتى بس عرفت أهمية السراية الصفرا


*** فلانة : ممكن تعرفنى على نفسك عشان هتبقى حب العمر ***
*** فلان : هحكيلك عن حياتى كلها !!! .. أنا من النهارده ملك قلبك !!!!!! انتى حددى و انا تحت أمرك ***
أشوف فيكم يوم بحق جاه النبى !!! الدماغ دى معجونة من ايه ؟؟؟؟ أنا خلاص هيجيلى شلل !!! ألطم يا اخوانا ؟؟؟؟؟


***أنا قلبى فاضى .... حد عايزنى أحبه ؟؟؟ ***
أنا مُت خلاص



***فلانة : عرفنى على نفسك يا فلان و ابعت رقمك .. أنا بحبك أوى ، فلان : أنا اللى بحبببببببك
أوييييى يا فلانة !! قوليلى صحيح هو انتى حلوة و لا ؟؟؟؟؟؟؟؟لاتعلييييييييق ...... أنا شكلى هموت تانى
ثوانى أموت و ارجعلكم




كلمة أخيرة :
اللى بيحصل ده كتيييييييييير .. شئ مايقبلوش لا قلب و لا عقل ولا منطق .. استهتار و استخفاف بالمشاعر و كذب مالوش نهاية و ضحك ع العقول !!!! و الدهشة انه كل اتنين بينافقوا بعض و الوسيلة الرخيصة ...... الحب !!!!!! مع ان كل كلمة حب غالية أوى .... ايه اللى جرى للناس ؟؟؟؟؟؟ و ايه اللى جرى للمجتمع ؟؟؟؟؟؟؟؟؟؟
انتوا ايه رأيكم فى اللى بيحصل دا

هههههههههههههههههههههههههههههههههههههههه
والله ياصاحبى الشات دا مالوش لازمه
لانه كلام فارغ وهبل
وتضييع وقت
اشكرك يامان على الموضوع
الجامد دااااااا

كل مافى الموضوع ان الناس بقت تستهتر أوى بكلمة بحبك مفكرين الحب لعبة أو حاجة يتسلوا بيها

يا جماعه مش كده الناس بقت فاضيه ومعاها فلوس كتير وبعدين يقولوللك البطاله ومفيش شغل يبطلوا شويه بقى
انا مش عارفه اقول ايه تانى بس خلاص المجتمع باظ